Mark 12
Di agoago e hagatau gi digau dogi mee
(Matthew 21.33-46; Luke 20.9-19)
1Jesus ga agoago i nia ala kai, “Tangada ga dogi dana hadagee waini, ga abaaba, ga hai dana gowaa tau waini, ga haga duu dana angulaa hagaloohi. Gei mee ga dugu gi ana gau dogi mee gi ngalua ai, geia ga hana haga mogowaa. a 2Di madagoaa taugai, gei mee ga hagau dana dangada hai hegau gi digau dogi mee aalaa, gi gaamai dono duhongo i di hadagee waini deelaa. 3Gei digau dogi mee ga kumi tangada hai hegau, ga daaligi, ga hagau gi hana, dana mee ne kae ai. 4Gei tangada dana hadagee waini ga hagau labelaa dana huai dangada hai hegau. Digau dogi mee ga hagamaawa di libogo o maa, ga hai di nadau hai e haga langaadia a mee. 5Gei tangada dana hadagee ga hagau labelaa dana huai dangada, gei digaula ga daaligi a mee. E dogologo ne hagau nomuli, gu tale huogodoo gi di haingadaa deelaa, hunu gau gu hagamamaawa, ge hunu gau gu daaligi gi mmade. 6Tangada dela ne dubu i golo, la go tama daane donu hua o tangada dana hadagee waini. Muliagi loo gei mee ga hagau hua dana dama daane gi digau dogi mee aalaa. Geia ga helekai, Au e iloo bolo digaula ga hagalabagau dagu dama daane. 7Gei digau dogi mee aalaa ga leelee i nadau mehanga boloo, Deenei la go tama donu a maa. Lloomoi, gidaadou ga daaligi a mee gi made, gei gidaadou ga hai mee gi nia mee ala belee hai mee ginai mee. 8Malaa, digaula ga kumi tama daane deelaa, ga daaligi, ga hudu tuaidina o maa gi daha mo di hadagee waini.” 9Jesus ga heeu, “Malaa, tangada dana hadagee waini la ga hai dana aha? Mee ga hanimoi, ga dadaaligi nia daane aalaa, ga wanga di hadagee waini gi nnuai daangada gi benabena ina. 10Goodou digi daulia di Beebaa Dabu dela e helekai boloo,Di hadu dela ne hudu gi daha go digau hau hale bolo di balu hadu, la gu hai di hadu dela e kaedahi e hagalabagau. b
11Di mee deenei la ne hai go Dimaadua, e haga goboina dangada.” 12Nia dagi o digau o Jew, gu hagamada belee lawalawa a Jesus, i digaula e iloo bolo di ala kai a maa le e hagatau ang gi ginaadou. I di nadau mmaadagu i digau dogologo aalaa, ga diiagi a mee, ga hula.
Di heeu o di hui dagitedi
(Matthew 22.15-22; Luke 20.20-26)
13Nia Pharisee mo digau hagamaamaa Herod ne hagau gi Jesus, belee haga ihala a mee gi nia heeu. 14Digaula ga lloomoi gi mee ga heeu, “Tangada Agoago, gimaadou e iloo bolo goe e helekai donu, e haga balumee nia hagabaubau dangada, ge hagalee hilihili dangada, ge e agoago di tonu i di hiihai a God gi nia daangada. Hagia mai be di maa e hai baahi gi tadau haganoho di hui tadau dagitedi gi di king o Rome? Gidaadou e hui be deeai?” 15Gei Jesus gu gidee i lodo nadau helekai halahalahau, ga helekai, “Goodou belee haga ihala au eiaha? Gaamai teenedi silber gi mmada au.” 16Digaula ga wanga di nadau teenedi, gei mee ga heeu, “Ma di ada ni ooi, ge di ingoo ni ooi aanei?”Gei digaula ga helekai, “Ni di king o Rome.” 17Gei Jesus ga helekai, “Malaa, wanga ina gi di king nia mee a di king, ge wanga ina gi God nia mee a God.”
Gei digaula gu goboina e-ginaadou a Jesus.
Di heeu di mouli aga mai di made
(Matthew 22.23-33; Luke 20.27-40)
18Nia Sadduccee, ala e agoago bolo nia daangada e hagalee mouli aga i di made, ga lloomoi gi Jesus ga heeu, c 19“Tangada Agoago, Moses gu hihi taganoho deenei: Taane ma ga made, gei dono lodo ga noho i golo, dana dama ai, gei dono duaahina daane ga lodo gi di ahina deelaa, gi gila mai di tama e ala be di tama ni taane dela ne made. d 20Dolomaa, tagahaanau daane dogohidu, di ulumadua ga hai dono lodo, nomuli ga made, di nau dama ai. 21Gei togolua daane la ga lodo labelaa gi di ahina deelaa, geia ga made labelaa, di nau dama ai, gei togodolu daane la go di hai la hua. 22Taga haanau daane dogohidu aalaa gu lodo huogodoo gi di ahina deelaa, gei ginaadou gu mmade huogodoo, nadau dama ai. Muliagina loo gei di ahina la ga made. 23Di madagoaa digau mmade ma ga mouli aga i di laangi o di mouli aga, di ahina deelaa la ga hai di lodo ni ooi? Idimaa, digau dogohidu aalaa ne lodo huogodoo gi mee.” 24Jesus ga helekai, “Goodou gu ihala, idimaa goodou ala de iloo nia helekai o di Beebaa Dabu mo di mogobuna o God. 25Digau mmade ma ga mouli aga, la hagalee hai nadau lodo, gadoo be digau di langi.26Deenei di agoago o di mouli aga i di made: goodou digi daulia di Beebaa Moses di kai o di laagau e ulaula? Magu hihi bolo God e helekai gi Moses boloo, Au go di God o Abraham, mo di God o Isaac, mo di God o Jacob. e 27Mee go di God o digau mouli, hagalee ni digau mmade. Goodou digau gu ihala.
Taganoho Aamua
(Matthew 22.34-40; Luke 10.25-28)
28Tangada haga dondonu haganoho i golo, e hagalongo gi nia helekai aanei. Mee gu iloo bolo nia helekai a Jesus ala ne hai gi nia heeu o nia Sadduccee, le e humalia. Geia ga hanimoi gi Jesus, ga heeu, “Dehee taganoho koia e hagalabagau i nia haganoho huogodoo?” 29Gei Jesus ga helekai, “Deenei taganoho koia e aamua: Israel, gi hagalongo! Dimaadua dela go tadau God, go mee hua dela go God. f 30Goe gi aloho i Dimaadua, go doo God, aga i lodo doo manawa, mo doo hagataalunga, mo au hagabaubau huogodoo, mo oo mahi huogodoo. 31Gei di lua haganoho le e hai hua be di maa, boloo, Goe gi aloho i tangada dela i doo baahi, gi hai be doo aloho i di goe. E deai taganoho labelaa i golo, e aamua laa hongo nia haganoho e lua aanei ai. g 32Tangada haga dondonu haganoho ga helekai gi Jesus, “Tangada Agoago, gu hai donu go au helekai ala gu hai boloo: Tagi la dela hua go God, deai di god labelaa i golo ai, dela hua go mee. h 33Tangada la gi aloho i dono God, mai i lodo dono manawa, mo ana hagabaubau mo ono mahi, gei gi aloho i tangada dela i dono baahi be dono aloho i deia. Koia e hagalabagau go di hai hegau gi nia haganoho e lua aanei, i tadau hai dela e wanga dehuia tadau manu gi hongo di gowaa dudu tigidaumaha, mono tigidaumaha huogodoo ala e hai ang gi God.” i 34Jesus ga iloo ia, bolo nia helekai a maa gu hai donu, geia ga helekai gi mee, “Goe hagalee mogowaa i Tenua o God.”Gei nomuli, gu deai tangada e heeu dana mee gi mee ai.
Di heeu di hai o Mesaia
(Matthew 22.41-46; Luke 20.41-44)
35Di madagoaa Jesus e hai ana agoago i lodo di Hale Daumaha, geia ga heeu, “Digau haga dondonu haganoho le e aha ala e hai bolo di Mesaia la di hagadili ni David? 36Idimaa, di Hagataalunga Dabu gu haga helekai a David:Dimaadua e helekai gi dogu Dagi boloo: Goe noho i dogu baahi gau donu, ga dae loo gi dogu madagoaa ma ga dugu oo hagadaumee gi lala oo babaawae. j
37David donu hua e gahi a mee bolo dono “Dagi”, malaa di Mesaia la di hagadili behee ni David?”
Jesus e haga iloo hagalliga gi digau hagadondonu haganoho
(Matthew 23.1-36; Luke 20.45-47)
Nia daangada dogologo nogo hagalongo tentene gi nia agoago a Jesus. 38Mee ga agoago gi digaula, “Goodou hudee kawe i digau haga dondonu haganoho ala e ulu i nia gahu lloo, ga heehee laa, gei e hiihai bolo nia daangada gi hagaaloho mo hagalaamua ina ginaadou i lodo di gowaa huihui mee, 39ge e hilihili nadau lohongo aamua i lodo nia synagogee mo lodo nia hagamiami. 40Aanei go digaula ala e mada maaloo e kae nia goloo o nia hale nia ahina gu mmade nadau lodo, ge e hai nadau dalodalo llooehaa i mua nia golomada o nia daangada. Malaa, nadau hagaduadua la koia e huaidu.”Tigidaumaha o di ahina gu made dono lodo
(Luke 21.1-4)
41Jesus e noho i lodo di Hale Daumaha, hoohoo gi di gowaa dela e dugu ginai nia tigidaumaha, geia ga daumada digau ala e dugu nadau teenedi. E dogologo digau maluagina e tigidaumaha nadau teenedi e logo. 42Di ahina hagaloale dela gu made dono lodo ga hanimoi nomuli, ga dugu ana teenedi e lua. 43Gei Jesus ga gahi mai ana dama agoago gi dono baahi, ga helekai, “Au e hagi adu gi goodou di tonu bolo tigidaumaha di ahina hagaloale deenei, la koia gu damanaiee i nia tigidaumaha digaula huogodoo. 44Digau ala i golo ne dugu nadau teenedi gi lodo di gowaa tigidaumaha mai i nadau maluagina, gei di ahina hagaloale deenei gu hagaodi anga ana teenedi ala belee hagahumalia ieia.”
Copyright information for
KPG